跈根行

【文、圖／彭欽清／國立政治大學退休教授】

 

　　記得還細該下，正月十六掛紙，愛先行點過鐘去到銅鑼个八燕坑掛三穴風水。有一穴講係來臺祖个，在吾姑个屋脣，已大穴。食飽晝，愛轉到大湖塚埔掛吾公个地。

　　民國五十空年，竹東共來臺祖个房頭內人帶等新編个族譜來認親，講逐年掛來臺祖就淨缺吾這房，尋誒幾下代人，附近仔鄉鎮尋交仔就尋無。屋下人正知跌忒兩代个風水，也正知吾這桍人係因爭地毋罅耕正會徙出來。

　　親戚講，來臺祖俞成公在乾隆中期同老弟俞烈公來到臺灣，先歇在湖口，下後俞成公一家人徙去竹東。嘉慶年間還識轉去修過墳，到日本時代還有人轉去過。族譜講，來臺祖係惠州府陸豐縣吉㝩都五雲洞黃驚埔人。

　　來臺祖爺哀个風水一直係原鄉个房頭內人𢯭掛，這五、六十年係長𠊎一輩个宗叔掛。五雲係共產黨个老基地，吾這宗叔个阿爸係黨員，分國民黨噼忒，這宗叔同厥哥走到臺灣來。該下還係日本時代，兩兄弟哪就去做零工絡食。下後去花蓮歇好多年，厥哥在該落腳，佢轉去五雲，這下還同子孫歇在該。臺灣解嚴大陸開放過後，兩兄弟正有聯絡，前成十年仔厥哥過身，食到九十零。

　　一個當好个朋友在汕頭開一間科技工廠，2000年請𠊎兩公婆去尞，佢知𠊎係客人，行程排好愛去梅州，聽講𠊎祖籍係陸豐，跈等就派一個師傅（運轉手）駛矮嫲仔䟓工載𠊎兩儕去陸豐走一輪。

　　駛忒幾下點鐘經過汕尾市，到誒陸豐就過晝缽𤊶了，食下晝繼續趕去陸河，會臨暗仔正到。探啊誒，去五雲還愛幾下點鐘，又講驚路項會有山賊，無法，師傅斡頭就遽遽駛轉汕頭。

　　轉到臺灣，𠊎煞煞打電話去竹東問个親戚，佢講幾下年前去廣東旅行，佢挷出一日包一輛車仔去五雲尋著該位宗叔，有去拜來臺祖爺哀个風水，還分𠊎厥電話同地址，係在京埔村个黃蓮塘。

　　2009年𠊎去廣東中山大學文學院，講一場同《客英大辭典》相關个講演。陳春聲院長係河婆人，佢知𠊎祖籍五雲，就在河婆脣項，講演忒愛去百過年前編這本辭典个五經富教會參觀同收集資料，會經過附近仔，佢講做得陪𠊎去尋根。

　　聯絡著宗叔，拜託佢準備牲儀金香，去到厥屋下坐一下仔，行成半點鐘仔正到墓地。碑石項有寫講係嘉慶二十三年來臺祖兩兄弟過𡜆（就係息嫲）雲萬整个，用倈仔過息嫲輩共下出名立墓碑个已罕得看著。陳院長講風水个地理已靚，面前幾百公尺仔有一口大魚塘，正對面个山背就係三山國王祖廟。該當晝，𠊎請宗叔去河婆个飯店食晝，送佢轉過後就去拜三山國王，拜煞正出發去五經富。

　　來臺祖係二十二世，到𠊎二十九世，兩百零年過後還尋得著厥爺哀个風水，實在真好福氣。

　　
（四縣腔）彭欽清教授 聲檔 — 跈根行





　

▲BACK